Exodus 18
Mosis Rie Lat Meatin Keil Avakatauni
Eksodas 18:1,5-11,13-27
1Avu tisa onen Mosis, kei vi pris onen me-Midian keil ka isen Setro. Kei raengon longlongien usil tounah vasi koa Ahi mumoni min me-Isrel keil en hen Mosis navong lah lat keil ran out Isip.5Sakini Setro mul mai ven keil en out volvol, en out koa amumon votevav one vesesal en Vatihou Saenae koa vi out votut onen Ahi. Kei mul mai ka kur ahin onen Mosis ral min natnealu keilu. 6Kei san selusien va min Mosis keke telmul telmai. 7Sakini Mosis mea ka va visu mini. Navong lesi, va netan mini en sakien ten houhouen ka mea kav kati. Telvis keitel keke telro mukave. Evus, telva en eim tavolin omon Mosis. 8Navong va neim, Mosis vit vasin tounah keil koa Iahova mumoni min asuv houlu ten out Isip ral min meatin onen keil keke kilea valah lat me-Isrel keil ran hen me-Isip keil. Kei vit usili mun mini mahien keil koa meatin keil akuri en sise ka mukave Iahova rali lat keil rani. 9Navong Setro long tounah keil enek, kei si houlu mok ka vit, 10“!Nasan masmasien min Iahova koa rali latuk ran hen asuv houlu ten out Isip ka meatin onen keil! !Nasan masmasien min Iahova koa rali lat meatin onen keil ran mahien ten eisisilien! 11Kosa nakul anatin keke Iahova, kei houlu loholin ahi teisav vasi keil, veni mumon tounah enek vasakin me-Isrel keil avamaluv ran hen me-Isip keil navong amules veah alei heisav en keil.”
13Out mulan eni, Mosis va mumon kot ven titi rea keil onen me-Isrel keil. Ka visokon va varei rokol vongien, mul rondan ka mul sak revi titi rea keil ka me-Isrel keil amulomal rahiti. 14Navong Setro les tounah vasi koa Mosis mumoni, visi vit, “?Komul komumonsa en meatin keil? ?Vensa komul korondan keik sasom enges, ka meatin keil amul umai amulomal avahisuk ven rendemien onom en visokon va rokol vongien?”
15Mosis vit kesi mini vit, “Numon tounah somok keil enek ven meatin keil amul umai venau, evati availea rendemien onen Ahi en moulien one. 16Navong meatin elu luvae, lumai venau. Ka inau, naviten koa vave keke kei mal. Evus, navit kilea selkatien ka mengkatien onen Ahi min keilu.”
17Evus Setro viteni mini vit, “Kormumontei vamal keinek. 18Keik komum vinik ka kosakin meatin keil emun akur mahien navong arosin rendemien onom taveah. Umen enek meas ramat keke keik sasom kovakuri. 19Kosak, masan more selkatien tai minuk vasakin Ahi heto hetal minuk. Mal enges keke keik kilong usil titi rea keil onen meatin keil ka kihatuk en meten Ahi en usite one. 20Mal keke kihisein keil en selkatien keil ka en mengkatien keil onen Ahi ka kihit kilea min keil sakien keil tetahos ka asa koa keil umoni. 21Ka hetahos imok keke kitie lati mun tei meatin keil koa kolesi avinvin avakataunuk, ka kiling keil ihi metai avalosil kat vangi meatin keil: vangi meatin koa halualim (10) amul ien; vangi meatin koa hanumau elu ka halualim mun (50) amul ien; vangi meatin koa hanumau elim (100) amul ien; ka vangi meatin koa taosen tai (1000) amul ien. Koakeil enek ihi vati meatin koa avouhou min Ahi, desien onen meatin sav keil amul en keil, ka asakras avakur mane en sise ten luvosien. 22Kiling koakeil enek ilei revi usite onen meatin keil. Lises keil akilea avasak revi titi rea koa maes. Ka tounah koa keih ramat, ikuri hemai venuk. Hemukonek, keil ikulat umen koa meas ranuk, ka hesakini hemaes minuk. 23Munak kumon sakien koanek, suval koa Ahi mul meng kati minuk, kirmum viniktei. Ka hesakin meatin keil vasi enek ilonge hetahos, ka iha ris teim en tomat.”
24Mosis long kat selkatien onen Setro. 25Sakini rie lat meatin keil koa avinvin ven umen koanek ka ling keil avi metai alosil kat vangi meatin keil: vangi meatin koa halualim (10) amul ien; vangi meatin koa hanumau elu ka halualim mun (50) amul ien; vangi meatin koa hanumau elim (100) amul ien; ka vangi meatin koa taosen tai (1000) amul ien. 26Keil alei revi usite onen meatin keil. Lises keil asak revi titi rea koa maes. Ka tounah koa keih ramat enges, akuri mai ven Mosis.
27Evus, Setro vit vaha ris teim sen. Sakini Mosis viten 'more' mini, ka Setro va ris en out kati onen.
Copyright information for
PMA